Пиринска Македонија

Вардарска, Егејска и Пиринска Македонија

Етничко македонско знаме се користи од македонците во Пиринска Македонија

Пиринска Македонија е дел од етничка Македонија. Се простира во југозападниот дел на денешна Република Бугарија, главно на територијата на Благоевградската област и е со површина од околу 7000 km².

Содржина

1 Историја
2 Население
3 Географија
4 Список на населените места во Пиринска Македонија
5 Македонски весници во Пиринска Македонија
6 Надворешни информации и врски

Историја

Главна статија: Историја на Пиринскиот дел на Македонија (1913 - 2005).

Пиринска Македонија e дел од етничката македонска територија Македонија, кој по Букурешкиот мировен договор во 1913 година припаднал на Бугарија. Во антиката Пиринска Македонија најпрвин била дел од Пејонија и Тракија, а подоцна станала дел од царството Античка Македонија. Во римскиот период Пиринска Македонија доживува своевиден процут, за што сведочат повеќето археолошки ископини на атнички градови во близината на денешните градови Благоевград, Сандански и др. Во средновековниот период Пиринска Македонија била под власта на царот Самуил, Византија и балканските феудалци. Со доаѓањето на Турците, Пиринска Македонија бележи одредена стагнација, но сепак не го напушта својот непокорлив македонски дух. За време на Руско-турската војна во 1877-8 година, северниот дел на Пиринска Македонија ќе потпадне под руската окупациона зона, но по Берлинскиот конгрес ќе и биде вратен на Турција. На подрачјето на Пиринска Македонија е кренато Кресненското (Македонското) востание против османлиската власт во 1878/79 година со центар во Кресна, кое имало силен македонски национален карактер и цел да создаде независна автономна македонска држава. Кон крајот на XIX век на територијата на Пирин со својата чета ќе царува големиот македонски револуционер и великан Јане Сандански (близок соработник на Гоце Делчев и најголем борец против врховизмот) кој е познат под прекарот „Пирински цар“ и кој ќе го изврши познатото грабнување на протестантската мисионерка Мис Стон. По Втората светска војна во времето на владеењето на Георги Димитров, Македонците од Пиринска Македонија ќе добијат целосна културна автономија која требала преку законска рамка да прерасне во територијална и Пиринска Македонија да се обедини кон тогашната СР Македонија како кон матична држава во рамките на Балканската федерација.

Според пописот од 1920 населението броело 155.598 жители. Во декември 1946 во Народна Република Бугарија е извршен првиот повоен попис на населението. Од вкупно 252.908 жители во Пиринска Македонија 70% се изјасниле како етнички Македонци; десет години подоцна (1956 г.) при пописот на населението во Пиринска Македонија од вкупно 281.015 жители, како Македонци се изјасниле 178.862 — или 63% од целокупното пиринско население. Денес, Бугарија не ги прифаќа резултатите од тие пописи, со аргументи дека биле спроведувани на недемократски начин во услови на сталинизам и репресии. Во првиот попис по падот на комунистичката власт во Бугарија, во Пиринска Македонија како Македонци се попишале 10803 луѓе^{[се бара извор]}. Според пописот од 2001 населението на Пиринска Македонија (Благоевградска област) брои 341.173 жители. Од нив како етнички македонци се декларирале 3117.[1]. Како мајчин јазик го декларирале бугарскиот 306.118 или 89,7%, 19.819 жители го признале за мајчин јазик турскиот, а 9.232 - ромскиот.

Официјални податоци од Бирото за статистика на Бугарија за националната структура на населението по околии од пописот во 1956 година:

Околии	Санданска	Петричка	Благоевградска	Разлошка	Гоцеделчевска	Вкупно
Македонци	89,49%	82,64%	52,18%	45,18%	45,77%	63,64% (178862)
Бугари	7,51%	15,15%	45,08%	39,05%	49,45%	33,33% (93671)
други	3,00%	2,16%	2,71%	11,92%	4,77%	3,03%

Население

Главна статија: Македонците во Бугарија.

Официјални податоци од Бирото за статистика на Бугарија за населението во Благоевградска област од пописот во 2001 година:

Етнички групи во Благоевградска област

Вкупно	Бугарска	Турска	Ромска (циганска)	Македонска	Друга
341.173	286.491	31.857	12.405	3.117	7.303
100%	83.97%	09.34%	03.64%	00.91%	02.14%

Географија

Во целост Пиринска Македонија може да се подели на 3 географски целини:

Планината Пирин во средишниот дел.
Долината и сливното подрачје на реката Струма (западно од Пирин планина) која во јужниот дел се до границите со Република Македонија и Грција во околината на Петрич е во плодна широка рамнина (котлина).
Долината и сливното подрачје на реката Места (источно од Пирин планина) која исто така во јужниот дел во околината на градот Гоце Делчев е плодна и пространа рамнина со повисока надморска височина од Петричкото поле.